Wednesday, December 17, 2014

Samay ki Bekaar Kavita

HINDI
Har minute mujhe kuch sunayi deta hai,
Ek shabd… 60 baar bas wohi shabd,
Maine poocha khud se, kisne likhi itni bekaar kavita,

Ghadi mujhe ghoorti rehti hai, maano galti meri hi hai.



ENGLISH
Every minute, I can hear something,
A word, just one word… repeated sixty times,
I wonder who has written a script so boring,
The clock stared at me as if the fault was mine.

Sunday, December 14, 2014

Duniya Madhosh Hai

Jhoomte sitaare,
ghoomti duniya,
girta suraj,
rengti galiyaan,
fisalti boondein,
ludakte pattey.

Poora jahan madhosh lag raha hai,
ek hum hi hosh mein reh gaye.

Friday, December 5, 2014

Mera Mann, Thaali ka Baingan, Saala!

Mera mann, thaali ka baingan, saala,
kal aazaadi ke liye ladha,
aaj ussi aazaadi se ladh raha hai.

Mera mann, thaali ka baingan, saala,
kal gusse mein dimaag se ladh baitha aur dil ko gale laga liya,
aaj dil ko mushkil mein chhod kar dimaag ke saath ho liya.

Mera mann, thaali ka baingan, saala,
kal zabardasti mujhe le gaya samandar kinaare,
aaj mausam bigadte hi chhod gaya mujhe akela.

Mera mann, thaali ka baingan, saala,
kal andhere se darr, dupak gaya tha mujhse,
aaj roshni hai, par phir bhi andhera dhoondne nikal gaya hai.

Mera mann, thaali ka baingan, saala,
kal apna sa lagta tha,
aaj kahin ka nahi lagta saala,
mera mann, thaali ka baingan, saala!

Zindagi, Tu Door Se Hi Achi

Door se dekho to zindagi bohot chhoti lagti hai,
paas mein jaane par pata chalta hai,
ek second bhi ek saal lagta hai.

Door se dekho to zindagi bohot haseen dikhti hai,
paas mein jaane par pata chalta hai,
zindagi to bas ek hara zakhm hai.

Door se dekho to zindagi mein dost anekon dikhte hain,
paas mein jaane par pata chalta hai,
hum bas sookhi ghaas hain jiske ird-gird sapole janmte hain.

Door se dekho to zindagi sach ki misaal lagti hai,
paas mein jaane par pata chalta hai,
khanjar dard se rota hai aur peeth kuch bol nahi paati.


Door se dekho to paas jaane ka mann karta hai,
paas mein jaane par pata chalta hai,
kaha fass gaye, hum to door hi ache the.

Monday, September 1, 2014

Toofan Ne Shuru Kiya

Main to ghoomne aaya tha,
baat karna to toofan ne shuru kiya.

Main to shaant rehne wala tha,
garajna to toofan ne shuru kiya.

Maine to moo tak modd liya tha,
kheechna to toofan ne shuru kiya.

Maine to ek hi shabd bola tha,
darrna to toofan ne shuru kiya.

Maine to bas phook maari thi,
bikharna to toofan ne shuru kiya.

Musafir to main tha,
lekin raasta khona to toofan ne shuru kiya. 

Tuesday, August 12, 2014

Chaand bada ho raha hai...

Wakt hai baarish ka, wakt hai chaand ke bachha banne ka,
ek liberal pita suraj uska naam,
ek hifaazat karti baadal naam ki maa,

pita chaand ko raat mein bhi khelne deta,
par maa to maa hai,
bachhe ko zyada bahar nahi aane deti,
“maa, thodi der khelne do, taare bula rahe hain,”
maa fatt se garaj jaati,

chaand khidki se chupke chupke bahar dekhta,
ek do pal ke liye awaaz laga leta taare doston ko,
par maa ke gusse se kaha bach paata,
baras jaati maa, chhup jaata chaand,

suraj bhi door intezaar mein baitha rehta,
kab dharampatni shaant hogi,
kab wo khud ayega aur apne chaand se bete ko,
lorri sunake, pyaar se sulaayega.

Wakt hai baarish ka,
wakt hai chaand ke bachha banne ka,

Tuesday, July 8, 2014

Advertising Words vs Real Words

      Raat ko ek jhokha aya,
sondha sa – na tez, na hi dheema,
seena paar karke, ungliyon se nikal gaya,
aur uda le gaya, shabd dar shabd, pal dar pal,

ek baar pooch hi liya hota,
bana hi leta ek pankti kam se kam,
koi matlab hi ban jaata,
nikal liye bina soche samjhe,
kaunsa main tumhe kaid kar jaata,

ek baar pooch hi liya hota,
koi vakya hi bana leta,
dete wakt thoda mujhe,
dhaage mein piro hi leta,
bala se meri, ghoomo lawarisab tum,
samajh le agar tumhe galat koi,
dosh na daalna mujhpar tum,

ek baar pooch hi liya hota,
tumhe gulzaar saab ka pata de deta,
ban hi jaate koi kavita, ya koi lokokti,
kam se kam, koi jhokha jab tumhe wapas laata,
tumhara arth padke,
main khudbhi dang reh jaata,

raasta ab aur koi nahi,
khelna hi padega ab jua,
mere YE shabd banaam mere WO shabd,
daav par hai meri chhavi,
mere do moohe shabd aur mere andar ka kavi,

ek baar pooch hi liya hota,
ye dohra khel na khelna padta,
saja deta tumhe bhi motiyon ki tarah,
hawa ka jhonka tumhe uda na paata,
rakhta kalam ki nok par tumhe,
likhta tassali se par likhta hi chala jata.

ek baar...bas ek baar pooch ke dekha hota,
kam se kam aaj subha,
client servicing se to na gaali khaata.

Monday, June 30, 2014

Armaanon ka Hammam

Bhale hi tu ho ek pathar ki moorat,
dekh ke har roz imaan rukhsat karta hoon,
armaanon ke hammam mein,
main bas bulbule udaate rehta hoon.


Imaan - Religion  |  Rukhsat - Bid Adieu  |  Hammam - Bubble Bath

Sunday, June 22, 2014

Whiskey in Monsoon

Karwahat mein pade wo barf ke tukde,
aur unpar girti baarish ki meethi boondein,

ab dekhna ye hai ki dil zyada rota hai... ya baadal.



Tuesday, March 25, 2014

Khabr Ka Mooh Vigyapan Se Dhaka Hai

har raat daawat bulaati thi aatma,
bulaati andar ke janwar ko,
aur saath mein andar ke insaan ko,
janwar ke liye irsha ke pakwaan,
aur pratishodh ki mithai,
insaan ke liye santushti ka samosa,
aur prem ki lassi,
har raat dono, din ki khabrein padhte,
janwar dushmanon ki, aur insaan shareer ki,
aur fir jiski khabron ka masala zyada teekha hota,
wo uss raat ka vijeta hota.

par kal raat sab shaant tha,
aatma soch mein pad gayi,
ki kya ye dono dost ban gaye hain,
ya ye shareer jiske andar ye dawat ho rahi hai,
wo marr chuka hai?
aatma se shabdon ka sannata bardaash na hua,
poocha janwar aur insaan se, aakhir kya hua?

dono bole milke,
"aaj khabrein to dher saari di tumne,
par har khabr ka moonh,
chupa diya vigyapan se,
koi sarkaari naukri bech raha hai,
to koi khushbudaar saabun,
koi kapdo ka tsunami la raha hai,
to koi yantron ka bawandar,
ab samajh ye nahi aaraha,
ki ye harkat jiski bhi hai,
wo jaanwar hai ya insaan hai,
par jo bhi hai,
hum dono se zyada khatarnaak hai"

Related Posts Plugin for WordPress, Blogger...